ЕАЭБге кирүүнүн алкагында айрым ишкердиктин түрлөрү боюнча каатчылыкка каршы иштер пландаштырылууда

Евразиялык экономикалык биримдикке кирүүнүн алкагында айрым ишкердиктин түрлөрү боюнча каатчылыкка каршы иштер пландаштырылууда. Экономика министри Олег Панкратов мындай маалыматты бүгүн, 20-майда Жогорку Кеңештин жыйынында билдирди.

Жыйында Панкратов “2000-жылдын 10-октябрында Астана шаарында кол коюлган "Кыргыз Республикасынын Өкмөтү менен Орусиянын өкмөтүнүн ортосундагы өз ара соодада кыйыр салык алуунун принциптери жөнүндө" макулдашууну денонсациялоо тууралуу” мыйзамдын долбоору боюнча баяндама жасады.

Маалыматка ылайык, мыйзам долбоору Кыргыз Республикасынын салык мыйзамдарын Бажы биримдигинин кыйыр салык салуу чөйрөсүндөгү ченемдик-укуктук база менен ылайык келтирүү максатында иштелип чыккан. Ал колдонуудагы мыйзамдарга толугу менен ылайык келет жана аны ишке ашыруу үчүн бюджеттен кошумча каржылоо булактарын табууну талап кылбайт.

Панкратов ишкерлерди колдоо максатында Кыргыз-Орус фонду түзүлгөндүгүн айтып, канаттуулар фабрикасы, ун өндүрүү сындуу айрым ишкерликтин түрлөрү боюнча каатчылыкка каршы иштер пландаштырылып жатканын билдирди. 

Мыйзам долбоору добуш берүүгө жиберилди.