Бишкекте дыйкандардын түйшүгүн жеңилдеткен техникалардын көргөзмө-жарманкеси өтүүдө

Бишкектеги эски аянтта дыйкандардын түйшүгүн жеңилдеткен техникалардын “Айыл агро-2015” эл аралык көргөзмө-жарманкеси өтүүдө. Ага Орусия, Беларусь, Америка, Германия, Индия өңдүү 15тен ашык мамлекеттен келген 40тай компания катышууда. Иш-чарада 100дөн ашык агрардык техникалар көрсөтүлүп, сатылууда. Уюштуруучу топтун мүчөсү Андрей Агашковдун айтымында, көргөзмө-жарманке быйыл үчүнчү ирет өткөрүлүп, жыл сайын катышуучулар менен кардарлардын саны өсүүдө.

“Иш-чара кыргыз мамлекетинин өкмөтүнүн жардамы менен уюштурулду. Бул жерде көбүнчө Орусиянын техникалары көрсөтүлүп жатат. Баалар, тилекке каршы, арзан эмес, бирок компаниялар мынча алыс жерге өздөрүнүн товарын алып келген соң, аларды бул жерде калтырууга, албетте, кызыкдар”,- деди уюштуруучу. 

Көргөзмөгө келген кардарлар үчүн жеңил өнөр жай жана башка товарлардын түрлөрү көрсөтүлүп, сатылууда. 

Көргөзмө-жарманке 22-майга чейин уланат.