Жогорку Кеңеште аймактарда нөшөрлөп жааган жаандан улам жүргөн селдин кесепеттери айтылды

Бүгүн, 21-майда Жогорку Кеңеште республика аймактарында нөшөрлөп жааган жаандан улам сел, кыяндардын кесепеттери айтылды.

Депутат Ирина Карамушкина Чүйдүн Сокулук районунун Кызыл-Туу, Саз айыл аймактарындагы айылдарды сел каптап, бир топ кыйынчылыктар жаралгандыгын тизмектеди. Анын маалыматы боюнча, бул аймактагы 61 объект селден жабыркаган, гектарлаган жерлерге айдалган жашылча-жемиштерди сел жууп кеткен, 6 көпүрө кыйраган. Селдин кесепеттери менен тааныштырган Карамушкина райондо эсептик-счёт ачылса, каржылык жардам көрсөтүүнү демилгеледи.

Ал эми депутат Мирлан Бакиров Жалал-Абаддын Сузак районундагы Кызыл-Үңкүр айыл аймагындагы Алтын-Кыя айылына баруучу жолду жыл сайын сел жууп кетерин, азыр дагы жол жарым-жартылай жабык экенин билдирди. “Жаз маалында, айрыкча жамгырдын көп жаашы күтүлгөн мезгилде селдин алдын алуу максатка ылайыктуу. Селдин кесепети менен күрөшпөй, анын алдын алуу акылга сыят, каражат бир топ үнөмдөлөт”,- дейт ал.

Депутат Алишер Абдырахманов Баткен районунун Зар-Таш айылындагы каналга дамба курулганын, жаандын көп жаашы менен каналдагы суунун деңгээли көтөрүлсө, буга чейин курулган дамбага жумшалган каражат текке кетпесин деген кооптонуусун айтып, дамбаны дагы бекемдөө керектигин белгиледи.