Министрлик: "Орус тили - мамлекеттик тил" деген статусу бар өлкөлөрдүн мигранттары Орусияда сынактан өтүшпөйт” деген маалымат так эмес"

Чет өлкөлүк кээ бир басылмалар бүгүн, 21-майда "Орус тили - мамлекеттик тил" деген статусу бар өлкөлөрдүн мигранттары орус тили, Орусиянын мыйзамдары жана тарыхы боюнча сынактардан өтүшпөйт. Мындай өлкөлөргө Казакстан, Кыргыз Республикасы жана Беларусь мамлекети кирет, бул өлкөлөрдө орус тили "мамлекеттик тил" деген статуска ээ" деген маалыматты жазып чыгышты. Бул маалымат ката болушу ыктымал, анткени кыргыз мамлекетинде орус тили мамлекеттик тил эмес, ал расмий гана статуска ээ. 

Бул боюнча SUPER.KG порталына Эмгек, миграция жана жаштар министрлигинен мындай жооп кайтарышты: “Азырынча бул жаңы долбоор боюнча толук жана туура бир нерсе айта албайбыз, анткени учурда министрдин орун басары Орусиянын Сочи шаарында мигранттардын маселесине арналган жолугушууда жүрөт. Келерки жуманын башында так маалымат белгилүү болот. Бирок Кыргыз Республикасы Евразиялык экономикалык биримдикке кирген соң, биздин мигранттар үчүн бир топ эшиктерге кирүү жеңилирээк болот. Алардын ичинде жогоруда айтылган экзамендерден мекендештерибиз ансыз деле бошотулушат”.