Жалал-Абад. Бүтүрүүчү класстардын шаан-шөкөт уюштурбоосу үчүн тынымсыз рейд жүргүзүлөт

Жалал-Абадда бүгүн, 22-майда билим берүү бөлүмүнүн жетекчилери, мектеп директорлору, мектеп президенттери жана ата-энелердин катышуусунда жыйын болуп өттү. Анда окуу жылын жыйынтыктоо жана "Акыркы коңгуроо", "Бүтүрүүчү күбөлүгүн тапшыруу", "Таң тосуу" сыяктуу салтанаттуу иш-чараларды өткөрүүдө жеңил автоунаалардын коштоосундагы жүрүштөрдү уюштурууга, ата-энелердин катышуусу менен ресторан, кафелерде, табиятта, оюн-зоок жайларында кечелерди өткөрүүгө жана акча чогултууга тыюу салынгандыгы боюнча талкуу жүрдү.

Мэриядан кабарлашкандай, жыйында ата-энелер жана окуучулар макулдук беришти. Алдыдагы 1 ай ичинде милиция жана билим берүү кызматкерлери тарабынан шаан-шөкөт уюшулуусуна каршы тынымсыз рейд жүргүзүлөт. Кайсы бир окуучулар тарабынан уюштуруучулук, акча каражатын чогултуулар болсо, аларга күбөлүк, аттестат берилбейт.

Кошумчалай кетсек, Жалал-Абад шаарында Акыркы коңгуроо салтанаты 29-май күнү өтөт. Шаар боюнча быйыл 667 окуучу мектепти жана 1429 окуучу 9-классты аяктоодо.