Бишкекте жашыруун иштеп жаткан кумаркана табылды

Бүгүн, 22-майда өкмөткө караштуу Экономикалык кылмыштарга каршы күрөшүү мамлекеттик кызматы Бишкек шаарында атайын жүргүзгөн операциянын натыйжасында жашыруун иштеген казино аныкталды. Мекеменин маалымат кызматынан билдиришкендей, бул жашыруун иш алып барган кумаркананы текшерүүгө алганда анын ичинен кумаркананын мыйзамсыз ишмердүүлүгүн жүргүзүүгө керектүү болгон буюмдар, кумар оюнчулары, дилерлер, покердик столдор, фишка, оюн карталары жана акчалар табылган.

Учурда бул факты боюнча материалдар жана табылган далил буюмдар юридикалык баа бериш үчүн Экономикалык кылмыштарга каршы күрөшүү кызматынын Иликтөө башкармалыгына өткөрүлүп берилди.

Кыргыз мамлекетинде кумарканаларга 2012-жылдын январынан тарта тыюу салынган. Ал эми ушул жылдын 29-апрелинде букмекердик кеңселер жана тотализатор бюролору жабылган.