"Евровидение-2015": Швециянын өкүлү Монс Зелмерлёв 1-орунду, орусиялык ырчы айым Полина Гагарина 2-орунду алды

24-майга караган түнү Австриянын Вена шаарында "Евровидение-2015" сынагынын финалы өттү. Анда 27 мамлекеттин өкүлдөрү Европадагы эң абройлуу сынактын жеңүүчүсү аталуу үчүн өз өнөрлөрүн тартуулашты. Жыйынтыгында Швециянын өкүлү Монс Зелмерлёв (365 упай) жеңүүчү аталды. Ал эми орусиялык ырчы айым Полина Гагарина (302 упай) 2-орунду камсыздады. Андан кийинки орундарга Италиянын, Бельгиянын, Австралиянын өкүлдөрү ээ болушту.  

Айта кетсек, жарым финалда чүчү кулактын негизинде аткаруучулар 2 топко бөлүнүшкөн (1-топто 16 катышуучу, 2-топто 17 катышуучу). Алар жарым финалда ушундай тартипте таймашып, финалчыларды аныкташты. Жыйынтыгында 2 топтон ондон ырчы (жалпы 20 ырчы) финалга жолдомо алды. Ошондой эле сынакты негиздеген өлкөлөр Улуу Британия, Германия, Испания, Италия, Франция мамлекеттеринин өкүлдөрү, сынактын былтыркы жеңүүчүсү - Австриянын өкүлү жана конок катары чакырылган Австралиянын өкүлү тандоо туруна катышпай туруп финалга жолдомо алышкан эле.