Бишкекте балдарга жана өспүрүмдөргө сексуалдык билим берүү туурасында мыйзамга каршы митинг өттү

Бүгүн, 25-майда Ак үйдүн астында балдарга жана өспүрүмдөргө сексуалдык билим берүү тууралуу мыйзамга каршы митинг өткөрүлдү. Нааразычылык акциясын “Баатыр ордо” коомдук фонду уюштуруп, анын төрагасы Адил Назаровдун айтымында, коомчулук жаңы мыйзамга каршы экенин билдирген кат президент Алмазбек Атамбаевге жөнөтүлдү.

“Быйыл 21-майда үчүнчү окууда Жогорку Кеңештин депутаттары “Жарандардын репродуктивдүү укуктары жана аларды ишке ашыруу кажети” туурасында мыйзамды кабыл алышты. Ага ылайык, өспүрүмдөргө эми секс туурасында сабактар өткөрүлөт. Мындай сабактар 1-класстан, башкача айтканда, 7 жаштан бериле баштайт экен. Биз талап кылабыз, бул сабактар жок дегенде 14 жаштан баштап берилсин, анткени 1-класстын окуучусунун психикасы секс туурасында маалыматты кабыл алууга даяр эмес.

Аталган мыйзамга азыр президент кол коё элек, бирок биздин маалыматтар боюнча, басмаканадан бул мыйзам 500 миң нуска болуп чыгарылды. Биз каршыбыз”,- дейт коомдук активист.