Жалал-Абад облусунда “Ар бир кесип ардактуу” аталышындагы иш-чара жүрүп жатат

Жалал-Абад облусунда “Ар бир кесип ардактуу” аталышындагы иш-чара жүрүп жатат. Бул тууралуу бүгүн, 25-майда аталган облустун ички иштер башкармалыгынан билдиришти.

Маалыматка караганда, бул иш-чаранын негизги максаты – окуучулар арасында, айрыкча бүтүрүүчүлөргө 29-май - Акыркы коңгуроо аземине карата алдын алуу жана түшүндүрүү иштерин жүргүзүү. Ошондой эле бүтүрүүчүлөрдүн келечектеги кесибине ылайык жогорку окуу жайларды тандоодо туура жол көрсөтүп, мекенчилдикке, улуттар аралык ынтымакка тарбиялоо болуп эсептелет.     

Иш-чаранын жүрүшүндө Жалал-Абад облустук ички иштер башкармалыгынын башчысы Жеңиш Жоробеков Сузак айылынын "Манас" орто мектебинде болуп, окуучулар менен жолугушту. Анда ал: “Жаштар - биздин келечегибиз, андыктан биз кайсы кесиптин ээси болбойлу, жаштарга колдоо көрсөтүшүбүз абзел. Сиздер кесип тандоодо туура чечимдерди кабыл алып, өлкөнүн өнүгүшүнө салым кошкон жаштардан болушуңарга тилектешмин”,- деди.