Жалал-Абад. Сузак районундагы Чаңгет суусунун жанында жайгашкан 4-5 айыл кооптуу абалда

Жалал-Абад облусунун Сузак районундагы Чаңгет суусунун жээгинде жайгашкан 4-5 айыл кооптуу абалда турат. Бул тууралуу бүгүн, 25-майда журналисттерге өзгөчө кырдаалдар министри Кубатбек Боронов билдирди. Анын айтымында, кооптуу абалда турган айылдардын бири Кыр-Жол айылына министрлик 1994-жылдан бери аймак кооптуу экендигин билдирип келген.

“Учурда аталган айылда 87 үй бар. Кооптуу делген жерден көчүрүү үчүн ар бир үй-бүлөгө 200 миң сомдон ссуда жана жер берилүүсү кажет. Алардын арасында өзү жашаган жерден көчкүсү келбегендер да жок эмес. “Өлсөк өлөбүз, бирок бул жерден кетпейбиз. Бир нерсе болсо күнөөнү сиздерге койбойбуз” дегендер жок эмес”,- деди министр.

Бороновдун айтымында, учурда өлкө боюнча 1034 кооптуу делген аймак бар. “Мындай жерлердин жашоочуларына жардам берилип келет. Кээ бир жарандар берилген жер тилкелерге балдарын көчүрүп коюп, өздөрү кооптуу делген аймакта жашоону улантышууда. Мисалы, 2012-жылы Сузак районундагы 108 үй-бүлөгө 8,5 гектарлык жер тилкеси берилген”,- деди Боронов.