Жумушсуздарга жумуш таап берүү үчүн бош орундар жарманкеси өттү

Эмгек, миграция жана жаштар министрлигинин Бишкек шаардык башкармалыгы 27-майда Бишкек эркин экономикалык аймагы менен биргеликте жумушсуздар жана кесиптик лицейдин бүтүрүүчүлөрү үчүн бош орундар жарманкесин өткөрдү. Бул тууралуу Бишкек мэриясынан кабарлады. 

Бишкек ЭЭАнын көргөзмө залында жумушсуздар жана кесиптик лицейдин бүтүрүүчүлөрү үчүн 28 мекемеден 200 бош орун сунушталды. Сунушталган бош орундардын көпчүлүгү жеңил өнөр жайга тиешелүү. Бул себептен жарманкеге кесиптик лицейлердин жана Кыргыз-Түрк кыздар лицейинин бүтүрүүчүлөрү чакырылды.

Бишкек ЭЭАнын башкы директору Орозбек Нусувалиев Эмгек, миграция жана жаштар министрлиги менен мекемеде бош орундарга жумушсуздарды орноштуруу боюнча кызматташарын билдирди. Аталган ЭЭАнын бош орундарынан тышкары бардык каалоочуларга Бишкек шаары боюнча 3000ден ашык бош орун сунушталды.

Ошондой эле министрлик жарандарга чет өлкөлөрдө: Түштүк Кореяда, Бириккен Араб Эмираттарында жана Орусияда жумуш табуу боюнча маалымат берди.

Жарманкеге 500дөй адам катышты. Анын ичинен 160ы кесиптик лицейдин бүтүрүүчүлөрү.