Бишкек мэриясы мыйзамсыз салынган турак жайларды бузууну улантууда

Бишкек мэриясынын Жеке турак жай куруу департаменти Ак-Босого конушунун Чүй көчөсү-№21 жана
№47-дарегинин жашоочулары тиешелүү уруксат документтерисиз муниципалдык жердин эсебинен жер тилкесин кеңейтип алышканын аныкташты. Бул тууралуу 29-майда мэриянын басма сөз кызматы кабарлады. 

Үйдүн ээси туурасы 3 метр, узундугу 50 метр өлчөмүндө кыштан дубал куруп алган. Аталган үйдүн ээси Акмат Саматовго бузуу жөнүндө эскертүү берилди. Департамент тарабынан берилген эскертүүнүн негизинде дубал алынды. 

Ошондой эле Жолдошбек Сатылбалдиев аттуу жарандын Чүй көчөсү-№21, 51-үйүнүн түндүк тарабынан туурасы 3 метр, узундугу 25 метр өлчөмүндө дубалын узартып алганы аныкталды. Азыркы учурда департамент тарабынан берилген эскертүүлөр жана протоколдун негизинде Биринчи Май райондук соту Сатыбалдиевге 10 миң сом өлчөмүндөгү айып салып, жер тилкесин баштапкы абалга келтирүү боюнча эскертүү берди.