Бишкекте майрам алкагында 1100 бала 1 миллиондон ашык сомго белек алды

Бишкектеги Токтогул Сатылганов атындагы Кыргыз улуттук филармониясында бүгүн, 1-июнда Балдарды коргоонун эл аралык күнүнө карата салтанаттуу иш-чара болуп өттү. Түшкө жакын филармониянын астына чогулган балдар үчүн шаардагы мектептер тарабынан даярдалган бий флешмобу тартууланды. Ал эми майрамдын экинчи бөлүгү концерттик залда улантылды. 

Салтанаттуу концертте райондун чыгармачыл балдары, “Таберик” музыкалык балдар театрынын жана “Кыргызстан балдары” шаардык борборунун тарбиялануучулары келген конокторго шаңдуу маанай тартуулашты. Майрамдык иш-чара мэриянын демилгеси жана каржылоосу менен өткөрүлүп, ага көп балалуу, социалдык коргоого алынган, жалаң "5" деген баага окуган окуучулар жана олимпиадалардын, ар кандай сынактардын жеңүүчүлөрү чакырылган. Салтанаттуу кеченин жыйынтыгында концертке келген 1100 бала ар кандай белектерге ээ болду. Белектер жалпы 1 миллион 223 миң сомго алынган.