Милиция кызматкерлери балдардын саламаттыгын сакташ үчүн аларды өз үйлөрүнө алууга мажбур болушууда

Коркунуч тобундагы үй-бүлөдөн баланы чыгаруу маселе жаратууда. Бул тууралуу бүгүн, 1-июнда “Балдарга карата зордук-зомбулук менен күрөшүү” темасына арналган тегерек столдун жүрүшүндө ИИМдин жашы жете элек балдардын иштери боюнча башкы инспектору Рысбек Мусуралиев билдирди.

Анын айтымында, аймактарда кризистик борборлор жок болгондугунан милиция кызматкерлери балдардын саламаттыгын сакташ үчүн аларды өз үйлөрүнө алууга мажбур болушууда. “Мыйзамга ылайык, кызматкерге баланы өз үйүнө алууга тыюу салынган. Анда баланы алууга ким укуктуу: социалдык мекеменин кызматкериби же укук коргоо органынын кызматкериби? Бул мыйзамда белгиленген эмес. Ошондуктан тиешелүү мыйзамды кароодо бул маселени чечиш керек. Коркунуч тобундагы үй-бүлөдөн баланы чыгаруу механизмин тезирээк иштеп чыгуу зарыл”,- деди Мусуралиев.

Айта кетсек, өлкөдө 22 672 бала ата-энесиз жашайт, 27 311 бала жарым жетим болсо, 48 403 бала аз камсыз болгон үй-бүлөлөрдө жашайт.