Чүй, Талас жана Бишкекте тургундардын электр тогунан жабыркабоосу үчүн профилактикалык иштер жүргүзүлдү

Чүй, Талас жана Бишкек шаарынын кичинекей тургундарына электр тогунан жабыркабоо боюнча профилактикалык иштер жүргүзүлдү. Бул тууралуу бүгүн, 2-июнда “Түндүк электр” ишканасынын басма сөз кызматынан билдиришти. 

Маалыматка ылайык, мекеменин адистери “Электр тогу”, “Электр шаймандары”, “Электр шаймандары менен иштөөдөгү техникалык коопсуздук”, “Электр көмөк чордондору” деген темада башталгыч жана орто класстардын окуучуларына тарбиялык мааниге ээ, кызыктуу сабактарды өтүштү. Ошондой эле электр чубалгы тирөөчтөрдүн жанында ойноонун канчалык коркунучтуу экени түшүндүрүлүп, айтылган эрежелерди билүү, аны кичинекей балдарга үйрөтүү жана чоңдорго эске салуу маанилүү экени айтылды.

16 жашка чейинки балдардын электр тогунан жабыркоосунун негизги себептери күчтүк калкакка,  трансформатордук көмөк чордондорго, бөлүштүргүч пункттарга жана башка электр-маанектерге кирүү, бузулган электр жабдууларга жакындоо, үзүлгөн зымдарды кармоо, электр коюлган жерлерде ойноо болуп саналат.