Кыргыз жергесинин жүк ташуучулары Кытайда миң долларга чейин айып пул төлөп кыйналышканы айтылууда

“Кыргыз жергесинин жүк ташуучулары Кытайда миң долларга чейин айып пул төлөп кыйналышууда”,- дейт бүгүн, 2-июнда маалымат жыйын учурунда КРнын Жүк ташуучу айдоочулар ассоциациясынын мүчөсү Малик Качаганов. Анын айтымында, КРнын оор жүк ташуучу унаалары Европа өлкөлөрүнөн алынып келинген. Тилекке каршы, алар Кытайдын мыйзамында белгиленген унаа параметрлеринен 5 сантиметр узун болгондугуна байланыштуу кыргыз айдоочулары чоң айып пулга жыгылышууда.

“Эки тараптуу келишимге ылайык, 50 жүк ташуучу унаа Кытайдан биздин өлкөгө жана ушунча эле унаа кыргыз жергесинен Кытайга кирүүгө укуктуу. Бирок биздин жарандар болбогон бир айырмачылык үчүн миң доллардан төлөп жатышса, бизде жүргөн кытайлык жүк ташуучулар белгиленген нормадан 2 метр ашыкча узундуктагы унааларды айдап жатышат. Бул жерде коррупция өкүм сүрүп жатканы анык көрүнүп турат, анткени биздин өлкөдө жүк ташуучу унаалардын узундугу 18 метр 10 сантиметр болсун деп жазылган, а кытайлыктар 20 метрден ашык жүк ташуучу унаа менен ээн-эркин жүрүшөт”,- дейт айдоочу.