Бишкекте дипломатиялык автоунаа айдагандардын жол эрежесин сактоосу текшерилди

Тышкы иштер министрлигинин Мамлекеттик протокол департаменти Жол-кайгуул кызматы менен биргеликте дипломатиялык автоунаалардын айдоочуларынын жол эрежелерин бузуусун, уурдалган, жасалма дипломатиялык номурларды таап кармоо максатында 29-майда "Дипномер" аталышында рейд уюштурду. Бул тууралуу бүгүн, 2-июнда ТИМдин маалымат кызматы билдирди. Текшерүү учурунда 20 эреже бузуу фактысы катталды. Алар:

Автоунааны тийиштүү документтери жок айдоо боюнча 7 факт;

Коопсуздук курун тагынуу талабын бузуу боюнча 7 факт;

Автоунааны токтотуу буйругуна баш ийбөө боюнча 3 факт;

Жасалма номур менен автоунаа айдоо боюнча 1 факт;

Атайын уруксатсыз автоунаанын айнектерин караңгылатуу боюнча 1 факт;

Атайын уруксатсыз автоунаага кошумча жабдыктарды орнотуу боюнча 1 факт. 

"Тышкы иштер министрлиги жакын арада автоунааларынын айдоочулары эреже бузган элчилик, консулдуктарга жана эл аралык уюмдарга тийиштүү нота жиберет",- деп билдирет ТИМ.