Фотожурналист: “Жалал-Абад облусунун прокуратурасы уюшкан кылмыштуу тобунун мүчөлөрүн жаап-жашырууда”

“Жалал-Абад облусунун прокуратурасы уюшкан кылмыштуу топтун мүчөлөрүн жаап-жашырууда”. Мындай пикирин бүгүн, 3-июнда маалымат жыйын учурунда фотожурналист Куватбек Осмонов билдирди. Анын айтымында, Сузак районунда бир катар мамлекеттик органдар биригип алып Кадыржан Батыровдун камакка алынган 10 гектар жеринин 2 гектарын мыйзамсыз сатышкан.

“2014-жылы президентибиз айдоо жерлерине мораторий жарыялаган болчу. Ошого карабай жерлер сатылууда. Бул боюнча биз Башкы прокурор Индира Жолдубаевага кайрылганбыз. Ал биздин айыл өкмөттөн бул тууралуу жооп сураганда Сузак районунун Экология жана техникалык инспекциясы “бул жерлер таштак жайыт болчу” деп жооп узатыптыр. Чындыгында, 10 гектар жер Батыровдуку болуп турган кезде күрүч өстүрүлчү. Бул фактылардын баарын облустук прокуратура жашырууда. Булардын Жогорку Кеңеште дагы колдоочусу бар экен”,- дейт Осмонов.