“Бишкекте мэриянын кызматкери 14 жашар баланы кулпунай сатканы үчүн ур-токмокко алды” дейт шаар тургуну

2-июнь күнү Бишкекте мэриянын кызматкери Эркин Бактияров 14 жашар баланы апасынын көзүнчө ур-токмокко алды. Бул тууралуу бүгүн, 4-июнда SUPER.KG порталына шаар тургуну Каныкей Акирова билдирди. Анын айтымында, окуя Чыгыш-5 кичи районундагы чакан базардын жанында орун алган.

“Кичи базардын жанында дайыма ар нерсе сатып отургандар бар. Ошол күнү Н.Исаматова да өзү өстүргөн кулпунайын 7-класста окуган баласы экөө сатып жаткан. Мэриянын кызматкери 3 сатуучунун арасынан дал ошол эжеге барып, орунду тезден бошотууну талап кылды. Көчөдө өтүп бараткан адамдардын көзүнчө аялды оозго алгыс сөздөр менен кемсинтип, кулпунай салынган чаканы көңтөрүп, таразаны сындырып жана айымдын 14 жашар баласын ичке тепти.

Кийин белгилүү болгондой, мэриянын кызматкери райондук ички иштер бөлүмүнө өзү биринчи барып, аны бирөө сабагандыгы жөнүндө арызын таштаган.

Бул окуяда эң жийиркеничтүүсү - аялды баласынын көзүнчө кемсинтүү жана баласын апасынын көзүнчө сабоо”,- дейт шаар тургуну.