"Өлкө калкынын 37 пайызы жакырчылыкта жашайт" дейт Темир Сариев

Өлкө калкынын 37 пайызы жакырчылыкта жашайт. Бул тууралуу бүгүн, 4-июнда “Баланын үй-бүлөдө жашоого укугу: жыйынтыктарды чыгаруу жана артыкчылыктуу багыттарды аныктоо” аттуу улуттук форумдун ачылышында КРнын Премьер-министри Темир Сариев билдирди. Анын айтымында, жыл сайын аз камсыз болгон үй-бүлөлөрдүн саны азаюуда.

“2012-жылы аз камсыз болгон үй-бүлөлөрдүн саны 115 800 болсо, 2014-жылы 105 500 болгон, ал эми быйылкы жылдын апрелине карата 104 000 үй-бүлөнү түздү.

2015-жылдын 1-январына карата кыргыз жергесинде жашы 18ге жете элек балдардын саны 2 миллион 235 миң, бул жалпы калктын 40 пайызын түзөт. Эл аралык стандарттарга ылайык, биздин өлкө жаштардын мамлекети болуп эсептелет. Акыркы үч жылда багып алууга 2420 бала, ал эми камкордукка 3808 бала алынган. Ошол эле учурда өлкөдө үй-бүлөдө жана балдарга карата жасалган зордук-зомбулуктун көп болуп жатканын массалык маалымат каражаттары күн сайын беришүүдө. Бул маселе менен күрөшүүгө өкмөт болгон күчүн жумшоодо”,- дейт Сариев.