Спорт агенттигинин директору өлкөдө спорттун эркин күрөш, грек-рим күрөшү, бокс жана грэпплинг сыяктуу түрлөрү өнүгүп жатканын айтты

Жогорку Кеңештин КСДП фракциясынын 5-июндагы жыйынында Дене тарбия жана спорт мамлекеттик агенттигинин башчысы Кадырбек Эргешов өлкөдө спорттун кайсы түрлөрү мыкты өнүгүп жатканын тизмелеп берди.

Анын айтымында, эркин күрөш, грек-рим күрөшү, бокс жана грэпплинг боюнча кыргыз өлкөсүнүн спортчулары эл аралык деңгээлдеги мелдештерде ийгиликтерди жаратып жатышат. "Биздин агенттикте спорт түрлөрү өнүгүшүнө жараша үч: А, В, С категорияларына бөлүнгөн. А тобуна аталган 4 спорт түрү кирет",- деди Эргешов.

Мындан тышкары ал командалык спорт түрлөрү кандай өнүгүп жатканына токтолду: "Биздин волейболчулар жана баскетболчулар жакшы көрсөткүчтөрдү көрсөтүшүүдө. Азия оюндарында волейбол боюнча командабыз өз тобунда 3-орунда жайгашты. Биринчи жолу ушундай деңгээлдеги мелдешке катышкан команда үчүн бул жакшы жетишкендик десек болот. Негизи, командалык спорт түрлөрүн өнүктүрүш үчүн каражат керек".