Чүй облусунун тургуну: «Балабыз аткезчилик менен күрөшөм деп кылмышкер кесиптештеринин колунан каза тапты»

«Балабыз Алмазбек Кадыркулов аткезчилик менен күрөшөм деп кылмышкер кесиптештеринин колунан каза тапты»,- деди бүгүн, 5-июнда маалымат жыйынында маркумдун апасы Дамира Кадыркулова.

Анын айтымында, 2015-жылдын 28-январында каза болгон Панфилов районунун ички иштер бөлүмүнүн кызматкери Алмазбек Чалдыбар бажы постунда жүктөрдү текшерип иштечү.

«Биздин оюбузча, балабызды колу таза эмес кесиптештери уу берип өлтүрүштү, анткени Алмазбек бажы постунан аткезчилик менен өтүп жаткан жүктөрдү көп кармап, аларды ачыкка чыгарчу. Ошондон улам бирөөлөргө акча табууга жолтоо болчу. Ички иштер министрлигинен алган Ардак грамоталары колго баткыс. Анан ушундай адамды көрө албай өлтүрүштү.

Ал жумушунда түшкү тамактан кийин эле башы катуу ооруп, кусуп, ооруканага жеткирилген. Бул окуя боюнча Панфилов райондук сотуна кайрылганбыз, алар ишти иликтемиш болуп, бирок кылмыш ишин 2-май күнү себепсиз жаап коюшту.

Экспертиза өткөрүлгөн жок, анткени баарыбыз балабызды жоготуп, шок болуп калганбыз.

Балабыздын артында жубайы жана бир кызы калды. Бирөөнү өлтүргөнгө эч кимдин акысы жок!»- дейт маркумдун апасы.