Ден соолугунун мүмкүнчүлүгү чектелгендер: "Бизге карата мамлекеттик саясат туура эмес жүргүзүлүп келет"

Ден соолугунун мүмкүнчүлүгү чектелген адамдардын укуктары мамлекеттик органдар, коомчулук жана кээ бир мыйзам бузган адамдар тарабынан бузулуп жатат. Бул тууралуу бүгүн, 8-июнда майыптардын укуктарын коргоого арналган тегерек столдо “Ден соолугунун мүмкүнчүлүгү чектелген адамдарга укуктук жардам берүү” коомдук фондунун президенти Толкунбек Исаков билдирди. Анын айтымында, учурда майып адамдарга оорукчан адамдардай мамиле жасалат.

“Мамлекеттик органдар ден соолугунун мүмкүнчүлүгү чектелген адамдарга медициналык мамиле жасашат, алар “буларды дарылаш керек” деп ойлошот экен. А чындыгында, бизге медициналык мамиле эмес, социалдык мамиле талап кылынат. Мисалы, өнүккөн өлкөлөрдө майып адамдарга атайын шарт түзүлүп, алардын ден соолугунун мүмкүнчүлүгү чектелген адам экенин билдирбей мамиле жасашат. Биздин укукту коргоо 70-80 пайыз медициналык камсыздоо менен толтурулган, бул туура эмес”,- дейт Исаков.