Бишкекте 2010-жылдагы Июнь окуясынын 5 жылдыгына арналган илимий-практикалык конференция өтүүдө

Бүгүн, 10-июнда “Ала-Арча 1” мамлекеттик резиденциясында “2010-жылдагы Июнь окуялары: себептери жана келечек үчүн сабактар” аттуу илимий-практикалык конференция өтүүдө. Ага президенттик аппараттын башчысы Данияр Нарымбаев, төрага Асылбек Жээнбеков, вице-премьер-министр Дамира Ниязалиева, саясий жана коомдук ишмерлер, окумуштуулар катышууда. Программа боюнча пленардык баяндамалар угулат.

Конференциянын ачылышында Июнь окуясында каза болгондордун жаркын элесине арналып бир мүнөттүк аза күтүү болду. Нарымбаев мамлекет башчы Алмазбек Атамбаевдин атынан кайрылуу окуду.

“Мындан 5 жыл мурун өлкөбүздүн Ош жана Жалал-Абад облустарында деструктивдүү күчтөрдүн айынан 400дөн ашуун мекендештерибиздин өмүрү кыйылды, миңдеген жаран жаракат алды, ал эми 10 миңдей жаран үстүндө үйү, каражаты жок калды. Бул акыркы 50 жылдагы этностор аралык 3-кагылыш болду. Ошондуктан Июнь окуясына объективдүү кароо жана илимий баа берүү келечекте мындай окуялардын кайталанбашына жардам берет”,- деп айтылат мамлекет башчынын кайрылуусунда.