Серепчи: “Ош шаарындагы базарларда кол араба сүйрөп иштеген балдар күнүнө 18 чакырымды басып өтүшөт”

"Ош шаарындагы базарларда кол араба сүйрөп иштеген жаш балдар бир күндө 700-800 килограмм жүктү ташышат". Муну бүгүн 12-июнда Балдарды коргоонун эл аралык күнүнө карата жарыяланган бир айлыктын алкагында “Биздин балдар - планетабыздын келечеги” аталышындагы тегерек столдун жүрүшүндө КРдагы Эл аралык эмгек уюмунун серепчиси Алмаз Султашев билдирди. Анын айтымында, базарда кол араба сүйрөп иштеген балдар жүк көтөрүп да иштешет.

“Мындай жумушта иштеген балдардын орточо жашы 12де экенин аныктап чыктык. Жаш балдар 1 суткада 12 саат иштешсе, өспүрүмдөр 13 саат эмгектенип, 18 чакырымды басып өтүшөт. Анан кардарды алар бир нече сааттап күтүп, муну менен катар бир бала бир жумуш күнүндө 13 каттам жасайт. Арабаны сүйрөөдө кичинекей балдар экиден болуп иштеп акча табышат экен. Ошондой эле мындай жерлерде рэкетчилик күч алган.

Айта кетсек, кол араба сүйрөгөн балдар бир эле кыймылды 1246 жолу кайталай бергендиктен, сөөгү ката элек балдардын сөөгү деформацияга учурап калууда”,- дейт серепчи.