14-июнда катуу шамал Жалал-Абад облусундагы бир катар үйлөрдүн чатырларын учуруп кетти

14-июнда Жалал-Абад облусунун Базар-Коргон районундагы Базар-Коргон айыл аймагында саат 17:50 чамасында катуу шамал катталган. Шамал Базар-Коргон айылында 3 турак үйдүн чатырын жана 1 сарайдын чатырын учуруп кеткен. Өзгөчө кырдаалдар министрлигинин маалымат кызматы мындан сырткары аталган райондун Кеңеш айыл аймагындагы Суу-Башы айылында 4 турак үйдүн чатырын, 1 бастырманын чатырын шамал учуруп кеткенин билдирди. Ошондой эле шамал Сузак районундагы Кызыл-Туу айыл аймагындагы Соку-Таш айылында 1 турак үйдүн чатырын учуруп кеткен. 

Ушул эле күнү Жалал-Абад шаарында сел жүргөн. Сел суулары 2 көп кабаттуу турак үйдүн жана 1 турак үйдүн жер төлөлөрүнө, 1 көп кабаттуу турак үйдүн, Аскер комиссариатынын, 1 орто мектептин жана өкмөттүн облустук ыйгарым укуктуу өкүлчүлүгүнүн имаратынын короолоруна кирген. Учурда суу кирген жер төлөлөрдү жана короолорду тазалоо иштери толугу менен аяктады.