Бишкектин Ауэзов көчөсүндө ишкердик кылгандар Өкмөт үйүнүн астына митингге чыгышты

Бүгүн, 15-июнда Бишкектин Ауэзов көчөсүндө ишкердик кылгандар Өкмөт үйүнүн астына митингге чыгышты. Алардын башкы талабы - “Чынар” жана “Динар” кичи базарларынын жанындагы Ауэзов көчөсүн бойлой жайгашкан 50гө жакын соода күркөсүнө иштөөгө уруксат берүү.

“Биздин күркөлөрдүн ошол жерде турушуна уруксат бербей жатышат. Бул талаш акыркы эки жылдан бери уланып келүүдө. Мэрдин айтымында, алар Ауэзов көчөсүн кеңейтишет. Ошондуктан биздин соода күркөлөрүбүз алынат экен. Бирок андай делгени менен, күркөлөр жолдон бир топ алыс туруп, оңдоп-түзөө иштерине тоскоолдук кылбайт. Ал эми жолго жакын жайгашкан аталган кичи базарларга эмнегедир чоңдор уруксат берип коюшту”,- дешти соодагерлер.