Чүй облусунда айдоочуну аткан жол-кайгуул кызматкери эки айга камакка алынды

Чүй облусунда айдоочуну аткан жол-кайгуул кызматкери эки айга камакка алынды. Окуяны Ички иштер министрлиги иликтеп жатканын мекеменин басма сөз катчысы Эрнис Осмонбаев билдирди.
Анын айтымында, жол-кайгуул кызматкери "кызмат абалынан аша чапкандык" беренеси боюнча айыпталып жатат. "Биздин маалыматыбыз боюнча, айдоочуга карата ок кокустуктан атылган. Биринчи жолу эскертүү иретинде асманга ок чыгарган. Ага да болбогон айдоочу жол-кайгуул кызматкерин жөлөп кетип, качууга аракет кылган. Ошол учурда жыгылган кызматкердин куралынан ок чыгып, айдоочуга тийген. Прокуратуранын чечими менен 2 айга камалды. Тергөө амалдары бүткөндөн кийин чечимди сот кабыл алат",- дейт ал.
Эске салсак, окуя 11-июнь күнү саат 21:30 чамасында болгон. Анда Бишкек-Ош унаа жолунун 39-чакырымында Ниссан Альмера унаасын токтотуу үчүн белги берилген, бирок айдоочу жол-кайгуул кызматкерлерине баш ийбей, унааны катуу ылдамдыкта айдап жөнөгөн. Анын артынан түшкөн кызматкерлер унаанын алдына чыгып, бири эскертүү иретинде асманга ок чыгарган. Ага да болбогон айдоочу жол-кайгуул кызматкерин сүзүп, качып кетүүгө аракет кылган. Ошол учурда жыгылган кызматкердин куралынан ок чыгып, айдоочуга тийген. Ал ооруканага жеткирилип, тилекке каршы, аны сактап калууга мүмкүн болгон эмес.