Кыргыз футболчулары оюн талаасында президент менен селфи жасашты

Президент Алмазбек Атамбаев бүгүн, 15-июнда Бишкектеги Дөлөн Өмүрзаков атындагы стадионго барып, 2018-жылы өтө турган Дүйнө чемпиондугунун тандап алуу этабынын алкагында Австралиянын курама командасы менен беттешүүгө даярданып жаткан кыргыз мамлекетинин футбол боюнча курама командасынын машыгуусун көрдү.

Мамлекет башчы футболчулар менен баарлашып, эртеңки маанилүү оюнга ийгиликтерди каалады. “Татыктуу оюн көрсөткүлө. Силер үчүн бүт өлкөбүз күйөрман болот. Биз силерге ишенебиз, силердин жеңишиңерге ишенебиз”,- деди Алмазбек Атамбаев.

Президент ошондой эле футболчуларга кыргыз мамлекетинде спортту өнүктүрүү жана кеңири жайылтуу боюнча жасалып жаткан иштер жөнүндө айтып берип, ири шаарларда, облустук жана райондук борборлордо дене тарбия-ден соолукту чыңдоо комплекстерин куруу пландарына токтолду. Андан кийин мамлекет башчы менен футболчулар эстеликке сүрөткө түшүшүп, чөнтөк телефондору менен селфи жасашты. 

Айта кетсек, 2018-жылы өтө турган Дүйнө чемпиондугунун тандоо турунун алкагында кыргыз мамлекети менен Австралия курамасынын ортосунда футболдук беттеш эртең, 16-июнда кечки саат 20:00дө өтөт.