Таласта өзүнүн 2,5 жаштагы уулун саткан жаранга карата кылмыш иши козголду

14-майда акыйкатчынын Талас облусундагы аймактык өкүлчүлүгүнө Гүлнара Миңбаевадан бала сатуу боюнча арыз түшкөн. Ал арызында сиңдиси Болотбек кызы Мунаранын күйөөсү Бактыбек Жээналиев өздөрүнүн 2,5 жаштагы уулун сатып жибергенин билдирген. Бул тууралуу акыйкатчынын басма сөз кызматы 15-июнда маалымдады.

Белгилүү болгондой, факты боюнча баланын апасы Талас ОИИБине арыз менен кайрылган, бирок укук коргоо органдары анын арызын кабыл алышкан эмес. Акыйкатчынын облустагы өкүлчүлүгүнүн кызматкерлери кийлигишкенден кийин кылмыш иши козголуп, баланын башка үй-бүлөгө сатылгандыгы текшерилип жатат. Маалыматка караганда, баланын ата-энеси ажырашып кеткенден кийин атасы уулун эч кимге айтпай өзү менен кошо алып кетип калган. Азыркы тапта "атасы тарабынан сатылды" делген бала апасына кайтарылып берилди.