Кыргыз футболчулары менен Австралиянын беттеши алдында Бишкекте 600дөй күйөрман катышкан жөө жүрүш пландалууда

Бүгүн, 16-июнда Бишкекте кыргыз футболчулары Австралия курамасы менен беттешет. Бул беттеш алдында Бишкекте 600дөй күйөрман катышкан жөө жүрүш өткөрүү пландалууда. Бул тууралуу SUPER.KG порталына күйөрмандар кыймылынын өкүлү Чынара Сабырова билдирди. 

Анын айтымында, кызыл түстөгү кийим кийген күйөрмандар 17:00дө "Жеңиш" аянтындагы Өчпөс оттун жанына чогулушат. Андан соң чогулгандар бир топ көчөнү кесип өтүп, беттеш өтө турган Дөлөн Өмүрзаков стадионуна 19:00дө келип калууну пландап жатышат. "Алдын ала мэрияга кат жазып, жөө жүрүш уюштурганга уруксат алдык. Жүрүштө кыргызча жана орусча ураан айтабыз. Биздин желектин өңүнө карап бул жүрүшкө кызыл түстө кийинип чыгууну туура көрдүк. Катарыбызга кошулууну каалагандарга кызыл түстө кийинип келүүнү сунуш кылабыз",- дейт Ч.Сабырова. 

Кошумчалай кетсек, 2018-жылы Орусияда өтө турган футбол боюнча Дүйнө чемпиондугунун тандоо турунда орун алчу беттеш 20:00дө башталат.