Дамира Ниязалиева: "Балдарга юридикалык билим берүү программасын кайрадан карап чыгуу керек"

"Эгер биздин балдарыбыз өздөрүнүн юридикалык укуктарын жакшы билишсе, алар башкалардын укуктарын бузушпайт. Балдарды укук таанууга окутуу программасын кайрадан карап чыгуу керек",- деп билдирди вице-премьер-министр Дамира Ниязалиева 16-июнда Ысык-Көлдө "Зомбулуксуз мектеп: балдарды тарбиялоону өнүктүрүүнүн жаңы ыкмалары" деген семинарда.   

2014-жылы өлкөдө мектеп окуучуларынын катышуусунда 200 укук бузуу фактысы катталганы айтылды. 126 суицид, 70 рэкетчилик, 4 мушташуу фактысы орун алган. "Тарбиялоо процессиндеги бардык татаалдыктарды эске алганда, балдарга тарбия берүүдөгү негизги милдет мугалимдердин моюнуна жүктөлөт",- дейт Ниязалиева. 

Вице-премьер мектеп директорлоруна балдардын арасындагы зомбулук жана суицид фактылары боюнча маалымат берүүнү табыштады. Мындан башка да терс көрүнүштөр тууралуу кабарлап туруу милдетин жүктөгөнүн өкмөттөн кабарлашты.