Айыпталуучуну эркинен ажыратпоо үчүн пара алып жаткан жеринен Балыкчы шаарынын соту жана адвокат колго түшүрүлдү

23 миң сом пара алып жаткан жеринен Ысык-Көл облусундагы Балыкчы шаардык сотунун судьясы жана адвокат кармалды. Бул тууралуу 19-июнда Коррупцияга каршы күрөшүү кызматынан билдиришти. 

Маалыматка караганда, 11-июнь күнү УКМКнын Коррупцияга каршы күрөшүү кызматына О.Т. аттуу жаран арыз менен кайрылган. Ал "тууганыңды соттук процессте эркинен ажыратам" деп коркутуп 35 миң сом өлчөмүндө акча талап кылган Балыкчы шаардык сотунун судьясы Б.Бга карата чара көрүүнү суранган.

18-июнда жогоруда аталган сот жана ортомчу катары жүргөн А.Н. аттуу адвокат 23 миң сом пара алып жаткан учурда колго түшүрүлгөн. Текшерүү иштеринин жүрүшүндө кылмышка шектүү соттон дагы 46 150 сом жана 200 доллар акча каражаты табылган. Факты боюнча кылмыш иши козголуп, пара алууга шектелгендер убактылуу кармоочу жайга жеткирилишти.