Спорт ишмерлери 77 жылдык тарыхы бар Д.Өмүрзаков стадионунун ордуна эл аралык стандарттагы стадион салууну суранышууда

Улуттук кураманын коргоочусу Азамат Байматов мамлекетибизге эл аралык стандарттагы стадион керек экенин белгиледи. Футболчу коңшу өлкөлөр андай стадиондорду эбак салып алышканын айтты. Бул маселеге КРнын Футбол федерациясынын вице-президенти Асылбек Кадыралиев да кенен токтолуп, азыркы стадиондо ойноодо чоң тобокелчилик бар экенин жашырган жок. “Бизге жаңы стадион керек. Дөлөн Өмүрзаков стадионун Австралия менен болгон беттеш алдында оңдоп-түзөп чыктык. Оюнга чейин элдин көптүгүнөн стадион кулап калат деген коркунучтар да болгон. Беттеш эл аралык талапка жооп берген стадиондо, башка өлкөдө болуп калышы мүмкүн эле. Коомчулук бизге жаңы стадион керек экенин түшүнүп, бийликтен суранганыбыз жакшы”,- деди.

Дене тарбия жана спорт мамлекеттик агенттигинин директору Кадырбек Эргешов жаңы стадион салууда 350-500 миллион доллар керектелерин айтты. Анын айтымында, алгач стадион салуу ниети болуш керек.

Кошумчалай кетсек, Дөлөн Өмүрзаков атындагы стадион 1938-жылы ишке берилген. 1962-жылы болсо кайра куруу иштери жүрүп, стадион кеңейтилген.