Кыргыз мамлекетинин жарандарына Орусиянын аймагында 30 күн каттоосуз жүрүүгө мүмкүнчүлүк берген документке кол коюлду

Кыргыз мамлекетинин жарандарына Орусиянын аймагында 30 күн каттоосуз жүрүүгө мүмкүнчүлүк берген документке кол коюлду. Мамлекет башчы Алмазбек Атамбаевдин катышуусунда макулдашууга 19-июнда Кыргыз Республикасынын Орусиядагы элчиси Болот Жунусов менен Орусиянын Федералдык миграциялык кызматынын башчысы Константин Ромодановский кол коюшту. Бул тууралуу президенттик аппараттан билдиришти.

Документке ылайык, Орусиянын жарандары да кыргыз жеринде ошондой шартта жүрө алышат.

Андан кийин Алмазбек Атамбаев менен Константин Ромодановский кол коюлган документке тиешелүү бир катар маселелерди талкуулашты. Кыргыз Республикасынын Евразиялык экономикалык биримдикке кошулуусу эске алынып, Федералдык миграциялык кызматы тарабынан үч жылга кирүүгө тыюу салынган Кыргыз Республикасынын жарандарына, эгерде ушул мөөнөттүн кеминде теңи өтсө, Орусияга кирүүгө уруксат берүү тууралуу чечим кабыл алынды.

Ошол эле учурда Орусиянын миграциялык мыйзамын бузган кыргыз атуулдарына 2015-жылдын 10-июлунан тартып 2015-жылдын 1-ноябрына чейинки мезгилде эч кандай санкция колдонбостон, Орусиянын аймагынан эркин чыгып кетүүгө жана тоскоолдуксуз кайра кирүүгө уруксат берүү тууралуу чечим кабыл алынды.