Ысык-Көлдө ышталган балыктын баасы былтыркыга салыштырмалуу өстү

15 жылдан бери Ысык-Көл облусунун Балыкчы шаарында ышталган балык саткан Эльнура Кутмединова быйыл жаңы кармалган балыктын баасы кымбаттап кеткенин билдирди. Анын айтымында, алар Орусиядан келген сельдь балыгын алып, аны союп, туздап, анан ыштап кардарларга сатып келишет.

“Жыл өткөн сайын балыктын бизге келип түшкөн баасы акырындык менен кымбаттоодо. Мисалы, былтыр сельдь балыгынын килограммын 90 сомдон алчубуз, жаңы жылдан баштап 106 сомдон кылып коюшту. Мындан улам былтыр эң арзан ышталган балык 40 сомдон сатылса, азыр 50 сомдон берүүдөбүз. Кичинекейлерин кээде гана 40тан сатабыз”,- дейт сатуучу айым.

Учурда Балыкчы шаарында “60 сомдук балыкты мейли 50 сомго алгыла” деген сатуучулар көп. Ал эми ышталган чоң сельдь 70тен өтүүдө.