Кочкор районунда 275 окуучуга туураланган мектептин курулушу башталды

Кечээ, 24-июнда Кочкор районунун Ак-Жар айылында 275 окуучуга туураланган мектептин курулушу башталды. Мектеп ушул жылдын октябрь айында бүткөрүлөт жана курулуш иштери үчүн республикалык бюджеттен 69 миллион сом каралган. Бул тууралуу өкмөттүн Нарын облусундагы өкүлчүлүгүнөн кабарлашты.

Маалыматка ылайык, курулуштун башталышына карата капсула салуу иш-чарасына облус башчысы Аманбай Кайыпов, Кочкор акими Нурбек Жусупбеков, “Имарат курулуш” ишканасынын башчысы Бейшенбек Иманалиев, жергиликтүү кеңештин депутаттары, мектеп мугалимдери жана айыл тургундары катышты.

Белгилүү болгондой, 422 окуучу окуган бул айылдагы мектептин өтө начар абалда экени айтылып келген. Кези келгенде окууну үзгүлтүккө учуратпоо үчүн окуучулар чатырларда да окушкан.