Социалдык өнүктүрүү министрлигинде балдар үчүн ишеним телефону ишке кирет

Социалдык өнүктүрүү министрлигинде балдар үчүн ишеним телефону иштей баштайт. Тийиштүү токтомго премьер-министр Темир Сариев кол койгонун 25-июнда аталган мекеменин маалымат кызматы билдирди.

Балдар үчүн ишеним телефонун ишке киргизүүнүн негизги максаты - балдар жана алардын ата-энелери, ошондой эле кыйын турмуштук кырдаалда калган балдардын мыйзамдык өкүлдөрү үчүн ыкчам психологиялык, маалыматтык, педагогикалык жана социалдык-укуктук көмөк көрсөтүү.

Мында аталган телефон боюнча түшкөн бардык маалымат сыр түрүндө сакталып, көмөк акысыз түрдө көрсөтүлөт. Телефондун иш алып баруусундагы негизги багыт катары балдардын укугун коргоо жана алардын коопсуздугун камсыздоо эсептелет.