Жогорку Кеңеш Кара-Суу районундагы 9 конушту айыл категориясына киргизүү боюнча мыйзамды кабыл алды

Бүгүн, 25-июнда Жогорку Кеңеш "Ош облусундагы Кара-Суу районунун Папан айыл аймагынын айрым калктуу конуштарын айыл категориясына киргизүү жөнүндө” мыйзам долбоорун 3-окууда кабыл алды. 

Калктуу пункттардын жашоочуларынын жыйындарынын токтомдорунун негизинде Ош облусунун Кара-Суу районунун Папан айыл аймагынын Ак-Буура-1, Ак-Буура-2, Ак-Буура-3, Ак-Буура-4, Камыр-Суу, Чычкан-Көл, Андагүл, Жаңы-Турмуш, Жар-Башы калктуу пункттарына айыл макамын берүү жөнүндө Папан айылдык кеңеши 2014-жылдын 13-мартында токтомдорду кабыл алган. Кара-Суу райондук администрациясынын 2014-жылдын 25-декабрындагы токтомдору менен жогоруда аталган калктуу пункттарга айыл макамын берүүгө макулдук берилген.

Аталган мыйзам жергиликтүү элдин ыңгайлуу жашоосуна шарт түзүүнү, алардын социалдык-экономикалык жактан өнүгүшүн, ички миграцияны азайтууну жана азыркы мыйзамдарга ылайык администрациялык-аймактык түзүлүштөрдү иретке келтирүүнү көздөйт. Калктуу конуштарды айыл категориясына киргизүү жергиликтүү жамааттарга өз конституциялык укуктарын ишке ашырууга, өз кызыкчылыгында жана өз жоопкерчилигинин астында жергиликтүү маанидеги маселелерди чечүүнү, натыйжалуу өнүгүүнү шарттайт.