Талас облусунда 18 миңден ашуун адам мамлекеттик жөлөк пул алат

Социалдык өнүгүү министри Кудайберген Базарбаев өткөн аптанын соңунда ден соолугунун мүмкүнчүлүгү чектелген аялдар үчүн тигүү боюнча курстар өтүлүп жаткан долбоордун алкагында Талас облусунун Кара-Буура районунда болду. Бул тууралуу 29-июнда мекеменин басма сөз кызматы билдирди.

Маалыматка ылайык, азыркы тапта 16 тургун жаңы кесипти өздөштүргөн. Иш сапардын жүрүшүндө министр селден коргоочу Иманбек атындагы каналды тазалоо иштерине да күбө болду.

“Аз камсыз болгон үй-бүлөлөрдөн чыккан 200 миңге жакын адам коомчулуктагы пайдалуу иштери үчүн долбоордун алкагында колдоого ээ болот. БУУнун жаңы долбоору буга чейинки ун менен майдын гуманитардык жардам катары таратылганынан айырмаланат. Эми жергиликтүү тургундар көпүрө куруу, каналды тазалоо, бак-дарактарды отургузуу сыяктуу иштерге жардамга тартылышат”,- деди ал.

Мындан сырткары Кызыл-Адыр айылындагы улгайган жарандар, ден соолугунун мүмкүнчүлүгү чектелгендердин энелери менен жолугушуп, үч инвалиддик колясканы тапшырды. “Жалпысынан Талас облусу боюнча 18 миңден ашуун адам мамлекеттик жөлөк пул алат. Алардын 4,6 миңи Кара-Буура районунда жашап келишет”,- деди министр.