Коомдук активисттер Мамлекеттик мүлк фондунун башчысынын жумуштан кетишин талап кылышууда

Бүгүн, 29-июнда маалымат жыйындын жүрүшүндө “Кыргыз чоролору” коомдук бирикмесинин өкүлү Уран Рыскулов "Мамлекеттик мүлк фондунун башчысынын жумуштан кетишин талап кылабыз" деп билдирди. Анын айтымында, “Мегаком”, “Кара-Балта спирт заводу”, “Дастан” жана башка ишканалар сатылганы жатат.

“Бул туура эмес. Эмнеге биздин стратегиялык объектилер сатылышы керек? Мунун баарын Мамлекеттик мүлк фондунун башчысы Алмаз Кадыркулов жасоодо. Бул адам буга чейин да көптөгөн жерден статья менен жумуштан айдалган. Мисалы, 2009-жылы 5 адам, анын ичинде Кадыркулов Директорлор кеңешинде турган кезде “Манас” аэропортундагы Отун-таратып берүү комплексинде мыйзамсыз иштерге барган, мунун кесепетинен мамлекетке 100 миллион сомго зыян келтирилген. Бул боюнча кылмыш иши козголуп, анын күнөөсү табылган. Ленин районунун сотунун чечими менен Директорлор кеңешинин мүчөлөрү Жамгырчиев жана Гуревич (алар качып кеткендиктен) сыртынан 15 жылга кесилген. Түшүнүксүз себептерден улам Алмаз Кадыркулов жоопкерчиликке тартылбай калган.

Ошол эле 2009-жылы Билим берүү министрлигинде орун басар болуп турган кезде "Континент" компаниясы менен мыйзамсыз тендер өткөзүп, мамлекетке 80 миллион сомго зыян келтирген. Мындай адам эми кантип мамлекеттик бийликти башкарып отурат?

Биз президентибиз Алмазбек Атамбаевге кайрылабыз, Кадыркуловду кызматынан алсын”,- деди коомдук активист.