Сооронкулованын таламын талашкан 100дөн ашуун адам Ак үйдүн алдына чогулду (фото)

Бүгүн, 30-июнда Ак үй алдында Конституциялык палатанын судьясы Клара Сооронкулованы кызматтан бошотуу маселесине каршы митинг өтүүдө. Мында 100дөн ашуун адам чогулду. Көпчүлүгү Сооронкулованын жакындары. Чогулгандар колдоруна "КДСП, "Ата Мекен", "Ар-намыс", мыйзамды тебелебе!", "Конституция оюнчукпу?!" деген жазуулары бар плакаттарды кармап алышкан. Ошондой эле "Жогорку Кеңеш, Сооронкуловадан колуңду тарт!" деп бир дем менен кыйкырып жатышат. 

Айта кетсек, Сооронкулова буга чейин жарандардын биометрикалык маалыматтарын алуу Конституцияга каршы келерин билдирген эле. Мындан кийин парламенттин сунушу менен Соттор кеңеши аны кызматтан бошотуу чечимин кабыл алган. Ал эми 29-июнда Жогорку Кеңеште аны кызматтан бошотуу добушка коюлуп, тилекке каршы, депутат Равшан Жээнбеков менен Акылбек Султановдун ортосундагы ызы-чуудан соң добуш берүү 30-июнга жылдырылган.