Темир Сариев президенттин атынан "Азия MIX" КВН командасына 1 миллион сомдук сертификат тапшырды

Бишкекте бүгүн, 30-июнда мектеп бүтүрүүчүлөрүнө арналган концерт КРнын Өкмөтү тарабынан уюштурулду. Майрамдык концертке өкмөт башчы Темир Сариев баш болгон өкмөт мүчөлөрү, билим берүү министри Эльвира Сариева, вице-премьер-министр Абдырахман Маматалиев, президенттик аппараттын башчысы Данияр Нарымбаев катышууда.

Концертти "Wi` ll Be" бий тобу ачып берди. Кечени Асхат Табалдиев менен Ростислав Ященко алып барышууда.

Иш-чаранын жүрүшүндө өкмөт башчы Темир Сариев бардык бүтүрүүчүлөрдү куттуктап: “Бүтүрүүчүлөр үчүн майрамдык концерт уюштуруу идеясы президентибиз Алмазбек Атамбаевге таандык. Азыркы учурда жаштарга көп көңүл бурулуп жатат. Биздин келечегибиз болгон бүтүрүүчүлөрдү окууну ийгиликтүү аякташы менен куттуктап, албан-албан ийгиликтерди каалайбыз. Кыргыз мамлекетин чет өлкөгө тааныткан жаштарыбыз көп, алардын катарында ийгилик жаратып келген "Азия МIX" КВН командасына президенттин атынан 1 миллион сомдук сертификатты тапшырып коюуга уруксат этиңиздер”,- деп Эльдияр Кененсаровго сертификатты тапшырды.

Ыраазычылыгын билдирген "Азия MIX" КВН командасынын капитаны Эльдияр Кененсаров тамашага салып: “Темир Аргенбаевич, сертификатты кайсы жерде көп суммага алмаштырат? Сизге келели, алмаштырып бериңиз”,- деди.