Коомдук ишмер: “Өлкөдө болуп жаткан жаратылыш кырсыктары Тарых музейинде жаткан мумияга байланыштуу”

“Өлкөдө болуп жаткан жаратылыш кырсыктары Тарых музейинде жаткан мумияга байланыштуу”,- дейт коомдук ишмер, публицист Мелис Арып-Бек бүгүн, 1-июлда маалымат жыйынында. Анын айтымында, Бишкектеги Тарых музейинде 60 жылдан бери сакталып турган мумиянын жаны өлкөдө болуп жаткан катаклизмдерге таасирин тийгизүүдө.

“1955-жылы археолог Юрий Баруздин Баткен облусунун Кара-Булак айылында аял жана эркектин 2 мумиясын казып чыккан. Эркек мумия топуракка айланган, ал эми аялдын денеси Тарых музейине жеткирилген. Мындан тышкары алтын жана башка баалуу буюмдар таланып жоголгон, кайсы бир бөлүгү Орусиянын музейлерине жеткирилген.

60 жылдан бери ал Анфиса аттуу мумиянын жаны көзү ачыктар аркылуу бизге кайрылып, өзүнүн көмүлгөн Баткен жерине жеткирүүнү суранууда. Айта кетсем, Анфиса Аманхатеп фараондун эң жаш үчүнчү аялы болгон. Аны улуу эки аялы уу берип өлтүрүшкөн экен. 

Биздин археологдор ага Япониядан антропология жана генетикалык анализ жасатууну аракет кылышууда. Ал качан жасалары белгисиз.  

Биз бул мумияны жерге бермейинче өлкөбүздө ар кандай жаратылыш жана башка кырсыктар көбөйүп кете берет. Жакында катуу шамалдан эки адамдын жаны алынды. Баткен, Ош облустарынын чек ара аймактарында ай сайын эле чыр-чатактар чыгып, адамдар ит атылгандай атылууда. Мунун баары токтойт, эгер Анфисанын мумиясы мурдагы жаткан жерине жеткирилсе”,- дейт коомдук ишмер.