Министр жаңы төрөлгөн ымыркайды "өлүү төрөлгөн" деп жардам бербей койгон №2-төрөткананын ишин көзөмөлгө алды

Саламаттыкты сактоо министри Талантбек Батыралиев жаңы төрөлгөн ымыркайды "өлүү төрөлгөн" деп жардам бербей койгон №2-төрөткананын ишин иликтеген комиссиянын иликтөөсүн жеке көзөмөлүнө алды. Бул тууралуу министрликтин басма сөз кызматы билдирди.

“Жаңы төрөлгөн бала болобу же пенсионерби, дарыгерлер бейтаптардын өмүрүн сактап калуу үчүн аягына чейин күрөшүүсү зарыл",- деди министр.

Маалыматка караганда, Бишкек шаардык саламаттыкты сактоо департаменти тарабынан №2-төрөтканадагы орун алган окуяны иликтөө боюнча комиссия түзүлгөн. Комиссиянын курамына тажрыйбалуу акушер-гинекологдор жана кафедралык кызматкерлер кирген.

Эске салсак, №2-төрөт үйүнүн дарыгерлери маалына жетпей төрөлгөн баланы карабай, ымыркай каза болгонун баланын атасы Эрмек Нургазиев айткан.