Кыргыз Республикасы менен Германиянын ортосундагы KfW`тин жергиликтүү бюросун түзүү жөнүндө макулдашуу ратификацияланды

Алмазбек Атамбаев “2015-жылдын 15-июнунда Бишкек шаарында кол коюлган Кыргыз Республикасынын Өкмөтү менен Германия Федеративдик Республикасынын ортосундагы KfW`тин (Kreditanstalt für Wiederaufbau - Германиядагы мамлекеттик банк, андагы акциялардын 80 пайызы Германиянын федеративдүү өкмөтүнө таандык) жергиликтүү бюросун түзүү жөнүндө макулдашууну ратификациялоо тууралуу” мыйзамга кол койду. Бул тууралуу 1-июлда президенттин басма сөз кызматы билдирди.

Мыйзам Кыргыз Республикасынын Жогорку Кеңеши тарабынан 2015-жылдын 26-июнунда кабыл алынган.

Ага ылайык, Кыргыз Республикасынын Тышкы иштер министрлигине белгиленген тартипте жогоруда көрсөтүлгөн макулдашуунун күчүнө кириши үчүн зарыл болгон мамлекеттик ички жол-жоболор Кыргыз Республикасы тарабынан аткарылганы жөнүндө Германия тарапка кабарлоо тапшырмасы берилди. Мыйзам расмий жарыяланган күндөн тартып он күн өткөндөн кийин күчүнө кирет.