Түркиянын Анкара шаарында кыргыздын улуттук өзгөчөлүгү даңазаланган кече өттү

Анкара шаарынын Кечиорен районунда 29-июнда Кыргыз Республикасынын Түркиядагы элчилиги жана Кечиорен райондук администрациясы тарабынан Орозо айына карата VI Эл аралык Орозо фестивалынын алкагында Кыргыз Республикасы кечеси өттү. Алгач фестивалда кыргыз боз үйүнүн ачылышы жасалып, анын ичине Каракол шаарынан алынып келинген кыргыздын уз-чеберлеринин кийизден жасалган буюмдары коюлуп, келген коноктордун кызыгуусун арттырды. Каалоочулар сатып алуу мүмкүнчүлүгүнө да ээ болушту. 

Түркиянын экология министри Идрис Гүллүже, кыргыз өлкөсүнүн Түркиядагы элчиси Ибрагим Жунусов, Кечиорен муниципалитетинин башчысы Мустафа Ак жана Каракол шаардык кеңешинин төрагасы Афтандил Абдыкадыров фестивалдын ачылышында сөз сүйлөшүп, жалпы элди Орозо айы менен куттукташты. 

Кеченин катышуучуларына кыргыз жеринен барган "Айкөл" тобу жана Ысык-Көл облустук музыкалык драма театрынын "Жаш тилек" бий ансамбли өнөрлөрүн тартуулап, майрамдык маанай жаратышты.