Баткенде медицина кызматкерлеринин кесиптик майрамы белгиленди

Өкмөттүн Баткен облусундагы ыйгарым укуктуу өкүлү Жеңиш Разаков облустун медицина кызматкерлерин кесиптик майрамы менен куттуктады. Бул тууралуу 4-июлда өкүлчүлүктүн басма сөз кызматы билдирди.

Саламаттыкты сактоо системинин кызматкерлери, облустук мекеме-ишканалардын кызматкерлери менен биргеликте “Биз сергек жашоо үчүн” деген ураан менен акция өткөрүлдү.

Облустук драма театрында майрамга арналган салтанат уюштурулду. Расмий бөлүгүндө Ж.Разаков куттуктоо сөз сүйлөп, учурда саламаттыкты сактоо тармагында реалдуу реформалар ишке ашып жатканын, анын ичинде калкка жогорку технологиялуу, жеткиликтүү жана өз учурунда медициналык жардам көрсөтүү үчүн материалдык-техникалык базаны чыңдоо иштери жүргөнүн баса белгилеп кетти. 

Ардак грамота менен облустун калкынын саламаттыгын сактоого кошкон зор салымы үчүн мыкты кызматкерлер сыйланышты. “Баткен облусуна 15 жыл” төш белгиси менен Баткен облустук бириккен ооруканасынын директору Тургунбай Айжигитов сыйланды.

Салтанаттын жүрүшүндө белгилүү болгондой, бүгүнкү күндө облуста медициналык кызматтын жеткиликтүүлүгүн камсыз кылуу максатында Үй-бүлөлүк дарыгерлер борбору, ФАП жана аймактык ооруканалар курулууда.