Жалал-Абадда үлпөт тойго чыгып, эреже бузган унаалардын ээлерине 2000 сомдон айып салынды

Июнь айынын башында Жалал-Абад шаарында үйлөнүү тоюнун кортежиндеги 10дой автоунаа айып аянтчасына токтотулуп, ээлери айып төлөштү. Жалал-Абад облустук ички иштер башкармалыгынын өкүлү Нурдин Жээнтаевдин билдиришинче, аталган унаалар жолдо жүрүү эрежесин одоно бузушкан.

"Баары айнектерин караңгылатып алышкан. Унаалар ошол эле күнү айып аянтчасына токтотулуп, ээлери 2000 сомдон айып пул төлөп чыгышты. Кортеждеги унаалардын саны 5тен ашпашы керектиги боюнча мыйзам кабыл алынып, Административдик кодекс жаңы берене менен толукталган. Ага ылайык, кортеждеги унаалардын саны 5тен ашып кетсе, 3 миңден 5 миң сомго чейин айып пул салынат. Жогоруда айтылган унаалар эки тойдун ээлери жалдаган унаалар болгондуктан, саны 10дон ашкан эмес. Бүнүнкү күндө бул мыйзамдын аткарылышын көзөмөлдөө күчүндө, андан бери Жалал-Абад шаарында мындай факт каттала элек. Жалал-Абад шаардык Жол-кайгуул кызматы түшүндүрүү иштерин жүргүзүүдө",- деп билдирди Жээнтаев.

Эскерте кетсек, Жалал-Абад шаарында үлпөт тоюуна 10дон ашуун унаа чыгып, шаардыктарга ыңгайсыздык жаратканын окурман SUPER.KG порталынын "Элдик кабар" рубрикасына кабарлаган эле.