"Күн ысыкта суусуз калганыбыз аз келгенсип, биз таза суу алган тундурмадан мышыктын өлүгү чыкты" дешет Орок айылынын тургундары

Орок айылынын тургундары күндүн ысыгында суусуз жашап жатышканын айтып, митингге чыгууга эл даяр экенин жашырбайт. Айыл тургундары SUPER.KG порталына билдиргендей, суу маселеси көп жылдан бери чечилбей келет. 

Алардын айтымында, акыркы 2 айда айылда таза суу жок. Айыл өкмөтүнө, "Бишкек суу-канал" ишканасына, спикер Асылбек Жээнбековго кайрылуу жолдонгону менен, майнап чыккан эмес. "Баш-Кара-Суу суу тосмосу Бишкек мэриясынын долбоорунун алкагында курулган. Коңшу айылдар суу менен камсыз болгон, биздин маселе чечиле элек. Айыл өкмөтүнөн аталган тосмо 2016-жылы иштейт деп билдиришти. Демек, суусуз дагы 1 жыл жашаш керекпи?" деп жазылат маалыматта. 

Анда айтылгандай, таза суу чыгарууда суу түтүктөрүнүн эскилиги байкалып, суу аз көлөмдө чыгып жатат. Аны оңдогонго айыл тургундары чыгууда. "4-июлда оңдоп-түзөө иштерин өткөрүп жатып суу топтолуучу тундургучтан жыландын жана мышыктын чирип калган өлүктөрүн табышты. Эл бул суудан ичет, алар жугуштуу оорулар менен ооруп калышса ким жооп берет? Тургундар бул маселе боюнча нааразы жана митингге чыкканга даяр. Президент Алмазбек Атамбаевден жана өкмөт башчы Темир Сариевден аталган маселени чечип берүүнү суранабыз",- дешет тургундар.